Otsailaren 21ean, ama-hizkuntzaren nazioarteko egunaren karietara, Plazara, AEK, Uda Leku, Dindaia eta Ebete egituretako kideak Baionan elkartu dira “Famili’on egonaldi” ibiltariaren lehen edizioa aurkezteko.
Babesle diren instituzioetako ordezkariak ere bertan izan dira proiektu berritzaile honi sostengua erakusteko: Mathieu BERGE Euroeskualdearen izenean, Joseba ERREMUNDEGUY Euskal Hirigune Elkargoaren izenean, Javi ARAKAMA Nafarroako Gobernutik eta Johañe ETXEBESTE Euskal Kultur Erakundetik.
Familian momentu goxoak pasatuz, ikasten segitu
AEK eta Uda Lekuk esperientzia handia dute ikastaldien antolaketan batzuek eta eskola oporren garaian aisialdi zentroetan besteek eta aspalditik zuten buru txoko batean, egun batez familien egonaldi baten antolatzearen ideia. 2023 hastapenean, Plazara kolektibo sortu berriak iniziatiba hartu eta eragile horiek mahai inguruan bildu zituen, oporrak familian pasatu ahal izatea eta euskara ikasten segitzea uztartuko lituzkeen egonaldi baten sortzeko.
Nolakoa izanen da egonaldia? Goizean, helduak euskara klaseetan izanen diren bitartean, haurrak jokoetan ibiliko dira. Arratsaldean, guraso-haur aktibitateak proposatuko dira eta arrats batzuetan, publiko zabalari irekitako animazioak. Helburu nagusia parte-hartzaileen euskara maila hobetzea da eta familien hizkuntza ohiturak aldatzea, baina baita Euskal Herriko xoko ezberdinak ezagutzea ere, euskararen eta euskal kulturaren bidez.
Aurten Ipar Euskal Herriko udaberriko oporrek bat egiten dute Hego Euskal Herriko Aste Santuko oporren bukaerarekin, Arabako San Prudentzio bestarekin eta maiatzaren 1eko zubiarekin, beraz, edizio honetan Euskal Herri osoko familiek parte hartzen ahalko dute. Horregatik dugu, besteak beste, Akitania Berria – Euskadi eta Nafarroa batzen dituen Euroeskualdearen eta Euskal Hirigune Elkargoaren sostengua.
Ilusioz eraikitako egonaldia
12 hilabetetako prestakuntza izan du proiektuak eta bi formula ezberdin sortu ditugu:
- Aste bat barnetegian, 5 egun eta 4 gau Baigorri (Baxe Nafarroa) eta Lesaka (Nafarroa) artean, maila aitzinatua duten gurasoentzat (B1-B2),
- Aste bat ikastaldian, 5 egun eta gau bat pasatuz Arbona (Lapurdi) eta Orio (Gipuzkoa) artean, oinarrizko maila duten gurasoentzat (A2).
Parte-hartzaileak horrelako egonaldietarako prestatuak diren zentroetan errezibituko dituzte lan-talde profesionalek (Oronozia, Matxinbeltzenea, Arantzola, Txurruka). Lasarte-Oriako Ebete kooperatibak familiako hizkuntza ohituren inguruan dituzten jakintzak partekatuko ditu eta Iruñeako Dindaia Fundazioak euskarazko aisialdian duen esperientzia ekarriko dio proiektuari.
Talde txikiak lehenetsi ditugunez, aste bakoitzean 20 familiak parte hartzen ahalko dute, 3 eta 11 urte bitarteko haurrekin. Aste bakoitzaren prezioa 300€ eta 650€ artekoa da, formularen eta seme-alaba kopuruaren arabera. Prezio horretan sartzen dira: apairuak, garraioa, lo tokia, aktibitateak, klaseak, animazioak eta materiala.
Izena emateko epea irekia da martxoaren 15era arte (larunbata), gure webgunean eta informazio gehiago behar izanez gero, AEK-rekin kontaktuan sar zaitezkete telefonoz (06.03.20.50.10) edo e-mailez (ikastaldi@aek.eus).
Hilabete hauetan, Famili’on egonaldia antolatzen duten 5 elkarteek elkar ezagutu dute, elkarrekin lan egiten ikasi dute eta etorkizuneko proiektu amankomunen inguruan amesten aritu dira. Lehen esperimentazio hau berritu eta indartu nahi lukete 2026an, Euskal Herri osoko familien arteko loturak (berr)eraikitzeko xedearekin. Bitartean, elkarte bakoitzak bere eguneroko lanetan segituko du euskararen alde, bizikidetza falta handia duen mundu batean.
BAIGORRI > LESAKA Hobekuntza barnetegia, mantenu osoarekin (B1-B2 mailak) | ||||
Apirilaren 21a astelehena Baigorri | Apirilaren 22a asteartea Baigorri | Apirilaren 23a asteazkena Baigorri | Apirilaren 24a osteguna Lesaka | Apirilaren 25a ostirala Lesaka |
GOIZA Aktibitateak familian, elkar ezagutzeko | GOIZA Klaseak gurasoentzat, aktibitateak haurrentzat | GOIZA Klaseak gurasoentzat, aktibitateak haurrentzat | GOIZA Klaseak gurasoentzat, aktibitateak haurrentzat | GOIZA Klaseak gurasoentzat, aktibitateak haurrentzat |
ARRATSALDEA Tailerrak Jokoak | ARRATSALDEA Tailerrak Jokoak | ARRATSALDEA Pista jokoa | ARRATSALDEA Lesakara | ARRATSALDEA Azken aktibitatea eta bilana |
ILUNTZEA Animazioak Gaua Baigorrin | ILUNTZEA Libre Gaua Baigorrin | ILUNTZEA Publikoari irekitako gaualdia (ipuin, antzerki, proiekzio) Gaua Baigorrin | ILUNTZEA Animazioak Gaua Lesakan | ILUNTZEA Etxera |
ARBONA > ORIO Ikastaldia, oinarrizko maila (A2 maila) | |||||
Apirilaren 28a astelehena Arbona | Apirilaren 29a asteartea Arbona | Apirilaren 30a asteazkena Arbona | Maiatz 1a LIBRE | Maiatzaren 2a ostirala Orio | Maiatzaren 3a larunbata Orio |
GOIZA Aktibitateak familian, elkar ezagutzeko | GOIZA Klaseak gurasoentzat, aktibitateak haurrentzat | GOIZA Klaseak gurasoentzat, aktibitateak haurrentzat | – | GOIZA Klaseak gurasoentzat, aktibitateak haurrentzat | GOIZA Klaseak gurasoentzat, aktibitateak haurrentzat |
ARRATSALDEA Tailerrak Jokoak | ARRATSALDEA Tailerrak Jokoak | ARRATSALDEA Pista jokoa | – | ARRATSALDEA Tolosara | ARRATSALDEA Azken aktibitatea eta bilana |
ILUNTZEA Etxera (edo logela partekatuetan gaua pasatzeko aukera) | ILUNTZEA Etxera (edo logela partekatuetan gaua pasatzeko aukera) | ILUNTZEA Publikoari irekitako gaualdia (ipuin, antzerki, proiekzio) | – | ILUNTZEA Animazioak Gaua Orion | ILUNTZEA Etxera |
